Betuchung Baka Langit, Nyulut Terus Lelegit

Lama udah ruai kitai enda dijenguk semina ditimpai belalai.  Ukai enggai ngenudukka diri muka licha tang mayuh penanggul ngasuh diri baka ke enda ngemana.  Taja bakanya berekat ti diterima Andam Families terus baka terutu ai ujan bangat ngampuhka menua. 

Taja mayuh deka dikunsi tang laban enda ulih bekelukau panjai deh anak indai, ka pan enda dilansa aja meh berita manah ti ngasuh ati temegah, berita badas ti ngasuh ati puas, berita baru ti ngasuh ati rindu.

Nya alai ditu dileka ka sekeda berita ngelansa di perempan tikai anyam sida dara ti pandai di chunggai ujung jari, dianchau ba ruai dibatan sida bujang kempang berani.

Pengujung Taun 2012
1.  Siku graduate sepintu lama udah dijapai ruang bilik kitai tang diatu nyau majak nyulut agi laban bisi udah Master Degree ari dua iku diri menyadi iyanya Kumbong Andam @ Mohd Ismail Abdullah enggau Ayong Andam.  Berasai ngeruang dada ninga pemujur sida aya ti landik becherita ngasuh ati tebelenga.

2.  Nyempulang pemujurnya Siti Ja'auyah mega sama niki panggau nerima topi besegi iya ianya "First Degree".  Naka meh enti sida ti udah laya sulai agi begulai, tak enda ngetu meh iya becherita laban telesak iya tak niki sereta negika nama nungkat ruang bilik Andam Families.

3.  Adriana Santa anak Tinggom udah mujur nampung pelajar ngagai tikas Master Degree.  Ichit Andam keterubah ngerembang madang lalang ba tikas nya. 

4.  Apai Beil a.k.a Cikgu Reynold niki pangkat nyadi Penolong Kanan.  Ukai anchi-anchi ga orang Sungai Tanju tu...

5.  Mayuh agi nyau enda ingat dilansa. 

Taun 2013
 1.  Pemutus peresa Joanne Michelle anak Tinggom amat nyulut bendar.  Nya alai iya udah bulih penuduk ba UNIMAS.  Meri pengaga ati ngagai anak Guru Besar tu.  Arapka terus nyulut.  Enda tinggal mega pemutus peresa Darren Dennis a.k.a Sengkuai ti diberi peluang nampung pelajar ba Politeknik Kuching.  Ibu sida iyanya Rachel Ayong mega enda tinggal nyingkang.  Diatu iya nampung pelajar diri ba OUM ngambi Diploma in Early Childhood.  Nya iya....

2.  Igat Luyoh anak Wuen mega udah nembuka pelajar iya ari Kolej Komuniti Betong.  Meri pengaga ati mega ngagai iya.  Konvokesyen iya kena bulan 9.

3.  Igat Alvin Kielland Jepin mega udah nembuka pelajar iya ari UiTM.  Meri pengaga ati mega.  Konvokesyen iya kena bulan 11.

4.  Hahahaha aku empu Nis Anak Henry Mamut mega ngasaika bakani pengaga ati nerima topi besegi ari USM taun tu.  Konvokesyen aku kena 21/9/2013. 

5.  Adriana Santa Anak Tinggom pan nyingkang jauh ninggalka orang.  Diatu iya udah nembuka Master Degree iya lalu deka konvokesyen kena bulan 10 tu ila.  Nya ni enda nyulut deh kitai laban kitai ti beserakup.

6.  Sida ke kereja enda ibuh ngira... Menyadi aku Katis Noel Nyabong niki pangkat baka ka nyingkang niki tangga.  Enda berasai iya ba N44 nyau engkechit ngagai N48.  Sigi pugu orang meh nuan bujang nyadi tiang nungkat menua.  Tang sayau amat peluang naburka budi ba menua diri enda nyadi nyata laban sida agi begunaka penemu iya ti chukup manah intu, chara iya ti chukup manah gaya, pengelandik iya ti chukup mansik. 

7.  Apai Ceaser a.k.a Tony Henry Mamut udah nerima orang baru dalam ruang bilik iya.  Pengada Ceaserina Bintang kena 11 Ogos tu tadi amat ngasuh ati seduai iya Indai Ceaser gaga laban enda nyangka diberi Petara berekat bakatu pengudah 15 taun nganti.  Naka meh pengaga Ceaser Andam udah bisi babby.  Chapuh meh sida Aki Cherry laban Endu Mit Bintang tu.

8.  Berita manah siti agi .... bini Sulung a.k.a Mummy Hero mega deka nambahka ruang bilik diri. 

9.  Bisi mega ninga rita ibu iyanya Siti Ja'auyah Ismail mega nerima tabi puji ketegal pengawa manah empai lama di Kuching.

10.  Sekali agi menyadi aku Katis Noel Nyabong ngelambung nama laban pansut ba TV maya enggau nyambut Hari Malaysia (16/9).  Balat pemedis kaki menyadi aku tu pelaba ka aku laban iya baru udah bebaris maya Hari Pengada TYT (14/9). 

Enti bisi berita bukai, arapka bala bukai sama update...

Andam Famlies Terus Nyulut

Berita manah terus diterima bala kitai sebilik. Amat manah meh tuah limpah ti dipesi sida niang ini niang aki ngagai kitai. Berekat terus diasaika baik dalam pengawa ti mit tauka ti besai. Kelimpah bala ti majak ngumpul ketupi besegi, bisi ga utai bukai diterima kitai. Berita ti baru iyanya Tuai Chairmain Andam Families ianya Mr. Katis Noel Nyabong deka dipaduka gawa ba endur baru. Tuai Chairmain deka ngeriput diri gawa ba endur baru iyanya Bangunan MASJA begulai opis enggau Dato Sri Dr James Jemut Masing. Iya deka ngeriput diri gawa din kena 2 Mei 2012. Tusah meh ati beserara tang kati gaya laban pengawa ti ngangau nesau. Taja bakanya, bala Andam Families terus nyampika awakka Tuai Chairmain kitai terus mujur dalam pengawa iya. Sama mega kitai nyampika pejalai turun pulai gawa tudah dilindung Petara lalu dikemataka dalam pengawa ti dikeraja awakka dipeda semua. Ah.. deh tuan... tak majak utai labuh ari langit neh. Bintang bedau ga dibasu nyau bedebu. Hahahaha! Diatu nyau bulih utai baru ga bubu. Tak lembau nyebut. Dini meh endur masu semua nya. Bai orang ke Pullman kini. BCCK tau ga. Hehehehe. Ukai nama deh rindu meda diri sebilik terus nyulut. Selamat mujur di tempat baru.

Lansa Berita 2012

Ahh... tak lama amat ga ruai kitai enda diundang disempiang. Nyau mayuh amat ga bala uras enda ditepas sida jawai bagas. Nya meh semua mayuh kereja tusah dikira laban nangkal getah pera ngiga sesen dua kena idup menyana. Nya alai kitai semina ulih ngaga berita pandak pasal utai ti nyadi ba Andam Families.

1. BERITA MANAH
* Mr. & Mrs Mohd Ismail (Kumbong Andam) deka nambahka ruang bilik Andam Families. Dipelabaka deka ada kena bulan Jun nyerumba taun baru kitai Dayak. Chukup manah berita tu. Meri pengaga ati ngagai seduai.

* MR. Katis Noel Nyabong nerima bintang ari TYT. Tu baru iya. Uchu ini Bintang ti bulih bintang. Amat Nyulut nuan deh madi. Arapka terus mujur dalam pengawa sereta terus tampak bebendang belama pegari di rita. Semua sama meri pengaga ati mega ngagai nuan wat.

* Mr. & Mrs Emannuel Sulong mega deka nambahka pemayuh tubuh ba Andam Families. Dipelabaka anak baru tu deka nyereta Andam Families bulan September. Arapka terus diberekat pengidup seduai iya.

* Pemutus peresa SPM Welty Mauline pan manah mega. 5A. Gaga amat ga ke pemutus peresa nya. Adrian Adam ba peresa UPSR bulih 4A, 1B. Udah dibasu tu seretai enggau Cemerlang Apai Iton. Amat mayuh berekat Petara. Terima kasih ke berekat nya lalu meri pengaga ati mega ngagai sida.

2. BERITA SINU
* Pun taun tu tadi sida Katis sebilik udah ditinggalka niang ini ti dikesayauka sida iyanya Sedai tauka lebih agi dikelala enggau Ini Muk. Penyiru enggau serakup bala Andam Families endang nyulut bendar ba pengawa ti suntuk bakatu. Arapka kitai terus beserakup dalam semua penguji enggau pemujur mega. Sama meh kitai ngeringka pangan diri dalam pengawa ti enggai nyadi tu.

* Ini Singgai di Kuching ditamaka ba hospital laban kena stroke. Lama ga iya di hospital sebedau dikemendarka pulai ke rumah. Kena seharitu, 10 April 2012, iya udah ngejangka dunya injau. Besampi meh kitai awakka iya diangkatka begulai enggau Apai di serega. Besampi mega ke sida Indai Singgai sebilik awakka terus kuat dalam napi penguji.

Enti bisi berita bukai, bala sama tau 'update' ditu. Nyangka bisi tinggal enda ingat aku. Arapka kitai terus beserakup....semampai nengkebang.... awakka kitai sama nyulut.

Andam anak Singai Setaun Udah Ngejang

16 Oktober 2011 genap setaun Andam anak Singgai udah ngejangka dunya injau, ngelengka ka ruang bilik ti dikesayauka iya lalu belelak di dunya apai ti bemulia. Kena ngingatka niang, dia bala telesak iya bisi nganjung bungai lalu besembiang ba pendam niang di Aup.

Taja buntau sereta lelak ketegal udah nguan sereta ngetas ulit niang ini Seda ak. Sakai tang nyampau ga bala ti ulih datai lemai nya. Bisi 20 iku telesak niang ngulu pengawa tu.

Bala ti datai besampi ba pendam niang diuluka Apai Santa (Tinggom Ensur).

Bala telesak niang Andam ak. Singgai deka ngatur pengawa besampi bebala mayuh di Jalan Cherry kena 22 Oktober 2011 lalu pagi nya deka meresi pendam niang dikena ngingatka pemulai niang ti udah setaun ngagai dunya Apai.

Arapka Tuhan terus beberekatka semengat niang sereta ngibun seduai ti udah ngejang. Besampi mega awakka telesak niang ulih terus beserakup dalam semua pengawa sereta besukung sama diri. Berekat mega terus mungkur pengidup semua telesak niang ti agi ba dunya injau tu.

Andam Families Belajar Bisnis

15 Oktober 2011 - Bala raban Andam Families bisi ngatur pengawa bejual lebuh maya SMK. Sibu Jaya bisi ngaga Hari Terbuka. Chukup lawa bala sida iya laban ngena kelambi Andam Families. Nampak amat beserakup.

Mayuh barang bisi dijual bala sida nyengkaum Laksa Sarawak (Specialties Indai Jarus), Sweet Corn, tenguyung manuk, cucur, kerepek, rempeyek, keropok, rampu enggau buah entekai (buah tikai ku Bella).

Pekara ti chukup manah amat iyanya sida bisi mai siku maskot iyanya Hesron... hehehehe. Manah amat ga iya tinduk enda pedulika angat enggau ragak.

Umbas iya ga asil jual sida laban barang abis magang. Em... stedy Andam Families. Sida tu bisi merambu deka bejual maya rami sekula ba Pasai ila. Jaga kitai.

Bintang Bekebelik Ba Langit Mingkai Andam Families

Ruang bilik besai Andam Families berasai temegah ati nyerumba sambut hari pengada tuai pemegai menua Nengeri Sarawak (TYT) ti empai lama iyanya kena 24 September 2011 ketegal tuai chairmain Andam Families iyanya Katis Noel Nyabong siku ari orang ti nyulut dalam pengawa dipeda bala tuai raban bansa udah dipilih nerima bintang.

Tuan chairmain kitai diberi Pingat Perkhidmatan Bakti(Perak) ari pemegai menua kitai. Berita ti chukup ngelantangka ati tu nyadi siti agi tanda bala Andam Families endang amat nyulut baka rambai jaku Andam Families nya empu.

Nya alai pengawa nandaka pengaga ati ketegal bulih bintang nya tadi bisi dipenyadi di rumah sida di Kemuyang kena 1 Oktober 2011 lalu disempulang pengawa ngintu pengada apai iya Noel Nyabong (61 taun) sereta anak iya Morpheus Tedong (11 tahun).

Nadai jaku terima kasih ti ulih disadaka bala Andam Families kelimpah ari beterima kasih ngagai apai ti bekuasa laban ketegal berekat iya dia deh kerja nyulut bala Andam Families udah dipeda lalu diaku bala pemegai menua.

Arapka semua bala Andam Families deka terus beserakup nengkebang peluang ti diberi orang awakka kitai terus nyulut ngangkatka nama sebilik besai kitai nyadi chuan teladan orang.

Sekali agi ..... KATIS NOEL NYABONG ..... kami TEMEGAH ATI enggau pemujur nuan lalu arapka berekat petara terus mungkur pengidup nuan awakka nuan terus mujur agi jemah ila sereta nyambut berekat ti besai agi.

TEKS JAKO PENGELALU CHAIRMAN MAYA PENGERAMI NGINTU HARI PENGADA NIANG ANDAM AK. SINGAI (95 TAUN)

ENDUR: RH HOTEL, SIBU

HARIBULAN: 24 JULAI 2010

Terima kasih ngagai tukang kangau kita, Cikgu Nis.

Tabi basa ngagai Andam ak. Singai, Paderi ka udah merkat pengawa baka k amalam tu, semoa bala aya, ibu, menyadi , ipar , menantu, anak, uchu enggau semoa bala kaban belayan Andam ka bisi datai baka ka malam tu.

Salam 1 Malaysia, Salam 1 Andam Families.

Nyadi aku berasai gaga amat laban meda bala maioh oleh datai baka ka sari tu, nyukung enggau ati ka enda belampong, ngambi pengerami ngintu hari pengada aki (Andan ak. Singai) ke 95 tahun oleh bejalai enggau manah serta deka dikingat kitai belama-lama. Aku meri terima kasih ngagai tuhan laban pengawa baka ka malam tu oleh dipennyadi. Pia mega aku meri terima kasih ngagai kita semua laban percaya ka kami sebuat ngatur pengerami serta program-pogram Andam Families. Program baka ka malam tu ianya program kedua kitai lepas Gawai Dayak 2010.

Naka pemalu mih tudah aku di lempedu kandang dada,
engka ukai sengaja mih nadai nyaut seleka dua,
nadai nimbal kita ukai enda bebasa,
engka bala tak kiruh mayuh kereja.

Nya mih aku tu tak luba-luba,
mantap bemban batu ngemalu mua aku,
mantap bemban ai ngemalu mua diri,
laban nadai penemu ulih dikarap,
baka terebai kubung nadai besayap.

Aku ga enda berani nyaut ngapa nyaut saja,
laban engka kita ke sigi udah pandai
dichunggai jari kiba,
baka sempama jaku orang kelia,
sebaru sigi lama udah nemu merau tang minta diajar ngemudi,
tawang sigi lama udah nemu bedagang diajar bebeli.

Nya alai enti aku enda landik bejako,
minta kita anang ngelanyai,
nyangka pemandai aku sigi nadai.
Enti aku nadai nemu nimbal,
minta kita anang ringat,
nyangka runding aku agi kapat.
Enti sema penemu aku bisi salah,
minta bala maioh anang mantah,
laban aku minta padah ngambika penemu aku betambah.

Enti nyema memaluh kelia diasuh kitai ngambuh,
Nemu mih iya bansa besi rantuh,
Enti nyema Baketan kelia diasuh kitai berikan,
Nemu iya kaban ikan ke benung ngaban,
Enti nyema Seru kelia diasuh kitai nubu,
Nemu iya reti kayu ke enda tau diambi ke diempa lebuh begulu,
Enti nyema Kantu kelia diasuh kitai ngupa pantu,
Nemu mih iya ni bagi ke tau ditegu,
Nya alai, enti tirih pantih Andam diasuh kitai ayan,
Nemu sida iya ngunsaika jurai ke tau ngasuh ati gidan,
Nya ke ngasuh atau ke kekelau baka ke labuh begitang lempuang.

Mensia ukai siku,
Nemu nya beranu, nemu mega sinu,
Bisi nya pandai, bisi mega tuyu,
Bisi nya gaga, bisi mega rindu,
Bisi nya kering, bisi mega layu,
Lalu sekeda nya bisi deka nguji ke peragam ati,
Kitai ke jelali megai simpul tali pencherang,
Kitai ke ngaduka ulu duku ilang.

Laban aku endang enda tau ngelulu ka kita ngena jako nyampau dirintai.
Aku ga endang deka nguji nitih ka ripih adat Iban,
Niti-nali nampong adat sida Aki Lang Menaul Buban.
Enggau tu aku arap ka kitai tu sama-sama nampok ngagai Tuchong Rabong Benama,
Ngambika kitai jelai rita nguan menoa.

Nyadi baka malam tu, aku deka berkongsi enggau bala maioh tentang aki (Andam Singau) ari segi leadership ia (tuai bilik , tuai rumah & menantu Niang Penghulu Janting) lalu aku deka ngupas perkara tu nitih ka rambai jako kitai ianya “Berserakup, Nengkebang, Nyulut” (BNN).

Andam Families,

Aki tu sigi ukai tuai sengapa, ukai tuai bula, ukai Tuai Pala Upa ka disema ke kitai ngaggai siku-suku tuai ke kelalu lembut tauka nadai penamu serta enda patut mangku pengawa tuai. Ia bisi kesemua 5 leadership qualities (Kouzes and Posner’s) ka patut dikembuan kitai ka nyadi ketuai:-

1. Honest

2. Forward-Looking

3. Competent
   

4. Inspiring
   

5. Intelligent

Nyadi kitai ka nampong ia, mesti nunjuk ka teladan ka badas, nyulut agi ari orang bukai baik ari segi penemu tuaka pengelandik serta mesti berserakup dalam ngerja semua pengawa. Anti semina “Banyak tai badak, mayuh tai nyumboh” - bala tubuh aja mayuh leboh ngereja utai tang utai ulih enda ngipak ke pemayuh tubuh, nya endang sigi nadai guna. Ia ka manah enti ngerja pengawa kitai mesti “Angkat engkerawai “(Siku angkat lalu orang bukai sama-sama angkat enggau iya sekali nyau nadai orang agi tinggal) lalu bisi impak ka besai / ngipak ke pemayuh tubuh bala Andam Fimilies.

Sempama “Makai empedu bangah” , enda tau bisi dalam Andam Families. Anang kitai bagas tauka rajin kereja ba (mua) urang tang ngelusu kereja ba diri empu. Enti iya disebut ngena jaku ke negatif, urang ke baka tu dikumbai kitai hipokrit.

Bala maioh bala banyak,

Buah ubi laun dikali buruk di pun, buah empasa laun diempa lunggar taun. Pekara ke manah/penemu ke menuku enti disimpan sereta enda dipekunsika enggau orang bukai, iya nadai beguna agi.

Buah kelala ari langgu, Bansa kelala ari jako

Enti enda diatu, Kemaia?, Enti enda kitai, Sapa??

Aku ngari ka bala maioh, meri besai terima kasih ngagai endo' Jacqueline (Indai Empari) laban amat landik “nengkebang” ngaga andamfamilies.blogspot.com. Nyadi kitai udah bisi facebook, link andam families & ia ka terbari ialanya andamfamilies.blogspot.com. Kitai maioh ruang endur kitai kongsi penemu, konsgsi gambar, ngerat ka kaul serta nyadi ka rekod serta promosi ngagai orang luar. Minta kerja sama semua meri komen kena kitai ngemah ka agi blogspot serta gunameh enggau betul.

Nyadi kena aku ngujung ka jako, aku deka bebiau ka aki enggau kitai semoa minta pengerai serta gayu nguan menua. Aki selalu ngasuh aku bebiau serta enti bebiau sebut besai ko ia, nyadi baka malam tu aku nunai ka peminta ia. Enti salah anang nganu, tolong ajar ngambi penemu makin bertambah:-

BEBIAU MINTA PENGERAI, GAYU

O-ha! O-ha! O-ha!
Nama ke semetak inggar temekung?
Munyi ke masak chagak bedil kelutung.
Tebah Kemendan Tuan Menggung,
Didinga ari pun Semambu Ngandung
Kunjung-kunjung nyadi benung Tajau Bujang,
Kebung ka burung tiung lelaki.

Nama ke semetak inggar didinga?
Munyi ke masak chagak bedil temaga
Tebah bini Tuan Raja
Didinga ari Singapura
Pansa geruda kapal bekejang,
Ngadap ka leka matahari mati.

Nama ke semetak inggar bemunyi
Munyi ke masak chagak bedil besi,
Tebah bini tuan Ipan Stephen Beti,
Didinga ari tisi langit lati,
Lanji-lanji tengkak sawang.

Ari nya baru aku ngangau ka
Ribai ke datai ari tasik besai
Linang ledung,
Betumpu alau, berimbai ruai,
Enggau Menyalin Bungai,
Tutup Temaga Lawai Bunsu Garai,
Berumah di rantau panjai
Tinggang telesai bungai engkuang.

Ngangau ka Chendung Lempung Pelingan,
Puchung begantung nengan bulan,
Bunsu Bundan, orang tau nangga
Gam gigi gumbang.

Rumbai tu beranak ka Endu Pupu Kebul Bebuli
Tu indu pemadu nama,
Dikumbai Dayang Tekang Mau Tuchi
Rega nengeri siti menua
Beranakka Lulung datai ari
Segupung Ati Tanah
Sembah di kelasah pandan bekuang.

Beranakka Kumang
Nepan di takang apung beluyah
Menyadi Saripah Aka Tuan,
Jadi enggau Sigi Beru Hari
Ninggang kunchi guntur beringgang,
Jadi enggau Sigai Beru Lemai
Ninggang telesai ujan sayang.
Nya orang ngemeran ka batu pesuk
Teman tunjuk jari lima
Ai belambuk ngampuh ka menua.
Nya menua Apai Miga
Betanduk ngena, umba ketapu
Buok galung bauh ngelagetang.

Rumbur ka Sibau rambuk bulu
Menua ampa raya tekebu,
Sebuah tukau bangkung langkau
Menua Lemandau datai ari ngelepau
Gumbang besabung.
Menua pating aur pengerindu
Lendu-lendu maguh ka
Ulu Belimbun Jawa.
Takang buluh ayu ngachuh ka ulu
Putih Menyala.
Nya menua Raja Bangka bedinding ngena
Gumbang menyadi.
Tuan Jandan bedinding hari
Sukadana Bebuli Ati.

Nya betampung enggau menua
Raja Segangga Gunggung
Penyadung Antu Tuah
Berimbai enggau Raja Segangga Ganggai
Penatai Antu Limpah,
Nya jadi enggau Kemeli Kemantan Padi
D’ambi mimpi jadi raja.
Jadi enggau Kemelat Tampuk Lensat
D’ambi kenyap tinduk lina.

Dia sida mai pengaruh,
Batu lementak bai ngabang
Ngambika tau nyelepak awak
Menua orang.
Batu duri bai ngabang
Ulih nemu di tuki ridan pengerang
Batu pabung mai ngabang
Ulih nemu di lampung tekalung pundang.

Taring uting babi ngelampai
Tanduk rusa mulai,
Gemala panggum tupai
Dibai orang tuai mansang nandai
Selit di punggai puting ilang.

Awakka gayu, awakka guru!
Awakka gerai nyamai!
Raja nguan menua!

Kami minta jalai bidik enggau lansik,
Minta betuah minta belimpah,
Minta gerai minta nyamai
Minta chelap minta embap.

Aku ngangau ka Petara Aki, Petara Ini,
Ngangau ka orang ke lama udah lelang,
Lama udah midang,
Sida ke udah parai, ke udah nadai,
Nya dikangau, ditesau,
Nya aku kumbai, aku lambai.

Nyaup aku ngupas padung, ngupas tilung,
Ngupas panggang, ngupas ruang,
Ngupas penuduk, ngupas peninduk,
Ngupas ruai, ngupas tikai.
Ngambika iya bau rengu, bau garu,
Bau empenit, bau bangkit.
Ngambika endur betunggah, endur besembah.
Ngambika tampak Tuan, tampak Sultan,
Tampak China, Tampak Belanda,
Tampak Laut, Tampak Bunut.

Tu endur besauh, endur belabuh,
Endur betanya, endur bepinta.
Ngambika kami mansang, kami nyegang,
Kami ngebung baka langit
Entuchung baka bukit.

Ruai kami baka danau
Tampak meh kami baka pulau
Gayu guru gerai nyamai semua kitai ku simpandai.

Terima kasih