Lama amai blog tu enda di update. Kelalu mayuh utai ti nyadi meri blog tu enda di update. Semua tu bepun ari...
Kena 16 Oktober 2010, pun ruang bilik tu ti ngujungka blog Andam Families digaga udah ngejangka dunya injau tu, ninggalka bala anak, uchu ambu, ichit wit ti dikesayauka iya lalu begulai enggau niang bini iya Biti anak Penghulu Janting ba dunya Apai ti bendar.
Pengelenyau niang endang chukup ngenyit laban niang nadai tentu sakit di peda mata. Semina seminggu niang dipasukka ba sepital bepun ari sakit renga enggau angat di diasaika iya. Nya alai bala telesak iya nadai nyangka niang deka ninggalka dunya injau tu.
Taja bakanya, Tuhan ti bekuasa nyangka udah meda pengelelak enggau pengasai ti bisi ba tubuh niang dia Tuhan udah ngangau ka iya belelak. Laban Tuhan nemu semua pengawa niang di dunya tu udah ditembuka lalu udah mujur ngempung ruang bilik iya dataika dikelala orang.
Mayuh jaku kenang tau dilansa ngagai aki apai ti dikesayauka bala anak menantu, aki ti dikesayauka bala uchu ambu ichit wit, tang awakka semuanya becherita dalam ati kitai ti tinggal ba dunya tu. Semina sampi aja ulih diberi kitai ngagai Tuhan ti bekuasa awakka terus merekatka semengat niang Andam Anak Singgai.
Ngagai semua tulung baik ari segi ngabas, nyengai, ngetas ulit, duit ringgit, jaku peransang tauka sampi, semua nya endang amat beguna ngagai ruang bilik tu. Arapka Tuhan malas budi kita ti nulung ngelempungka ma berat ba kami sebilik. Amen.
AKI... PENYAYAU KAMI NGAGAI NUAN MENGKANG BELAMA, PENGINGAT ENDA MUDAH LUYA TAJA TIMPUH BELIDAR... KAMI SEMAMPAI LELENGAUKA NUAN.
