Andam anak Singai Setaun Udah Ngejang

16 Oktober 2011 genap setaun Andam anak Singgai udah ngejangka dunya injau, ngelengka ka ruang bilik ti dikesayauka iya lalu belelak di dunya apai ti bemulia. Kena ngingatka niang, dia bala telesak iya bisi nganjung bungai lalu besembiang ba pendam niang di Aup.

Taja buntau sereta lelak ketegal udah nguan sereta ngetas ulit niang ini Seda ak. Sakai tang nyampau ga bala ti ulih datai lemai nya. Bisi 20 iku telesak niang ngulu pengawa tu.

Bala ti datai besampi ba pendam niang diuluka Apai Santa (Tinggom Ensur).

Bala telesak niang Andam ak. Singgai deka ngatur pengawa besampi bebala mayuh di Jalan Cherry kena 22 Oktober 2011 lalu pagi nya deka meresi pendam niang dikena ngingatka pemulai niang ti udah setaun ngagai dunya Apai.

Arapka Tuhan terus beberekatka semengat niang sereta ngibun seduai ti udah ngejang. Besampi mega awakka telesak niang ulih terus beserakup dalam semua pengawa sereta besukung sama diri. Berekat mega terus mungkur pengidup semua telesak niang ti agi ba dunya injau tu.

Andam Families Belajar Bisnis

15 Oktober 2011 - Bala raban Andam Families bisi ngatur pengawa bejual lebuh maya SMK. Sibu Jaya bisi ngaga Hari Terbuka. Chukup lawa bala sida iya laban ngena kelambi Andam Families. Nampak amat beserakup.

Mayuh barang bisi dijual bala sida nyengkaum Laksa Sarawak (Specialties Indai Jarus), Sweet Corn, tenguyung manuk, cucur, kerepek, rempeyek, keropok, rampu enggau buah entekai (buah tikai ku Bella).

Pekara ti chukup manah amat iyanya sida bisi mai siku maskot iyanya Hesron... hehehehe. Manah amat ga iya tinduk enda pedulika angat enggau ragak.

Umbas iya ga asil jual sida laban barang abis magang. Em... stedy Andam Families. Sida tu bisi merambu deka bejual maya rami sekula ba Pasai ila. Jaga kitai.

Bintang Bekebelik Ba Langit Mingkai Andam Families

Ruang bilik besai Andam Families berasai temegah ati nyerumba sambut hari pengada tuai pemegai menua Nengeri Sarawak (TYT) ti empai lama iyanya kena 24 September 2011 ketegal tuai chairmain Andam Families iyanya Katis Noel Nyabong siku ari orang ti nyulut dalam pengawa dipeda bala tuai raban bansa udah dipilih nerima bintang.

Tuan chairmain kitai diberi Pingat Perkhidmatan Bakti(Perak) ari pemegai menua kitai. Berita ti chukup ngelantangka ati tu nyadi siti agi tanda bala Andam Families endang amat nyulut baka rambai jaku Andam Families nya empu.

Nya alai pengawa nandaka pengaga ati ketegal bulih bintang nya tadi bisi dipenyadi di rumah sida di Kemuyang kena 1 Oktober 2011 lalu disempulang pengawa ngintu pengada apai iya Noel Nyabong (61 taun) sereta anak iya Morpheus Tedong (11 tahun).

Nadai jaku terima kasih ti ulih disadaka bala Andam Families kelimpah ari beterima kasih ngagai apai ti bekuasa laban ketegal berekat iya dia deh kerja nyulut bala Andam Families udah dipeda lalu diaku bala pemegai menua.

Arapka semua bala Andam Families deka terus beserakup nengkebang peluang ti diberi orang awakka kitai terus nyulut ngangkatka nama sebilik besai kitai nyadi chuan teladan orang.

Sekali agi ..... KATIS NOEL NYABONG ..... kami TEMEGAH ATI enggau pemujur nuan lalu arapka berekat petara terus mungkur pengidup nuan awakka nuan terus mujur agi jemah ila sereta nyambut berekat ti besai agi.

TEKS JAKO PENGELALU CHAIRMAN MAYA PENGERAMI NGINTU HARI PENGADA NIANG ANDAM AK. SINGAI (95 TAUN)

ENDUR: RH HOTEL, SIBU

HARIBULAN: 24 JULAI 2010

Terima kasih ngagai tukang kangau kita, Cikgu Nis.

Tabi basa ngagai Andam ak. Singai, Paderi ka udah merkat pengawa baka k amalam tu, semoa bala aya, ibu, menyadi , ipar , menantu, anak, uchu enggau semoa bala kaban belayan Andam ka bisi datai baka ka malam tu.

Salam 1 Malaysia, Salam 1 Andam Families.

Nyadi aku berasai gaga amat laban meda bala maioh oleh datai baka ka sari tu, nyukung enggau ati ka enda belampong, ngambi pengerami ngintu hari pengada aki (Andan ak. Singai) ke 95 tahun oleh bejalai enggau manah serta deka dikingat kitai belama-lama. Aku meri terima kasih ngagai tuhan laban pengawa baka ka malam tu oleh dipennyadi. Pia mega aku meri terima kasih ngagai kita semua laban percaya ka kami sebuat ngatur pengerami serta program-pogram Andam Families. Program baka ka malam tu ianya program kedua kitai lepas Gawai Dayak 2010.

Naka pemalu mih tudah aku di lempedu kandang dada,
engka ukai sengaja mih nadai nyaut seleka dua,
nadai nimbal kita ukai enda bebasa,
engka bala tak kiruh mayuh kereja.

Nya mih aku tu tak luba-luba,
mantap bemban batu ngemalu mua aku,
mantap bemban ai ngemalu mua diri,
laban nadai penemu ulih dikarap,
baka terebai kubung nadai besayap.

Aku ga enda berani nyaut ngapa nyaut saja,
laban engka kita ke sigi udah pandai
dichunggai jari kiba,
baka sempama jaku orang kelia,
sebaru sigi lama udah nemu merau tang minta diajar ngemudi,
tawang sigi lama udah nemu bedagang diajar bebeli.

Nya alai enti aku enda landik bejako,
minta kita anang ngelanyai,
nyangka pemandai aku sigi nadai.
Enti aku nadai nemu nimbal,
minta kita anang ringat,
nyangka runding aku agi kapat.
Enti sema penemu aku bisi salah,
minta bala maioh anang mantah,
laban aku minta padah ngambika penemu aku betambah.

Enti nyema memaluh kelia diasuh kitai ngambuh,
Nemu mih iya bansa besi rantuh,
Enti nyema Baketan kelia diasuh kitai berikan,
Nemu iya kaban ikan ke benung ngaban,
Enti nyema Seru kelia diasuh kitai nubu,
Nemu iya reti kayu ke enda tau diambi ke diempa lebuh begulu,
Enti nyema Kantu kelia diasuh kitai ngupa pantu,
Nemu mih iya ni bagi ke tau ditegu,
Nya alai, enti tirih pantih Andam diasuh kitai ayan,
Nemu sida iya ngunsaika jurai ke tau ngasuh ati gidan,
Nya ke ngasuh atau ke kekelau baka ke labuh begitang lempuang.

Mensia ukai siku,
Nemu nya beranu, nemu mega sinu,
Bisi nya pandai, bisi mega tuyu,
Bisi nya gaga, bisi mega rindu,
Bisi nya kering, bisi mega layu,
Lalu sekeda nya bisi deka nguji ke peragam ati,
Kitai ke jelali megai simpul tali pencherang,
Kitai ke ngaduka ulu duku ilang.

Laban aku endang enda tau ngelulu ka kita ngena jako nyampau dirintai.
Aku ga endang deka nguji nitih ka ripih adat Iban,
Niti-nali nampong adat sida Aki Lang Menaul Buban.
Enggau tu aku arap ka kitai tu sama-sama nampok ngagai Tuchong Rabong Benama,
Ngambika kitai jelai rita nguan menoa.

Nyadi baka malam tu, aku deka berkongsi enggau bala maioh tentang aki (Andam Singau) ari segi leadership ia (tuai bilik , tuai rumah & menantu Niang Penghulu Janting) lalu aku deka ngupas perkara tu nitih ka rambai jako kitai ianya “Berserakup, Nengkebang, Nyulut” (BNN).

Andam Families,

Aki tu sigi ukai tuai sengapa, ukai tuai bula, ukai Tuai Pala Upa ka disema ke kitai ngaggai siku-suku tuai ke kelalu lembut tauka nadai penamu serta enda patut mangku pengawa tuai. Ia bisi kesemua 5 leadership qualities (Kouzes and Posner’s) ka patut dikembuan kitai ka nyadi ketuai:-

1. Honest

2. Forward-Looking

3. Competent
   

4. Inspiring
   

5. Intelligent

Nyadi kitai ka nampong ia, mesti nunjuk ka teladan ka badas, nyulut agi ari orang bukai baik ari segi penemu tuaka pengelandik serta mesti berserakup dalam ngerja semua pengawa. Anti semina “Banyak tai badak, mayuh tai nyumboh” - bala tubuh aja mayuh leboh ngereja utai tang utai ulih enda ngipak ke pemayuh tubuh, nya endang sigi nadai guna. Ia ka manah enti ngerja pengawa kitai mesti “Angkat engkerawai “(Siku angkat lalu orang bukai sama-sama angkat enggau iya sekali nyau nadai orang agi tinggal) lalu bisi impak ka besai / ngipak ke pemayuh tubuh bala Andam Fimilies.

Sempama “Makai empedu bangah” , enda tau bisi dalam Andam Families. Anang kitai bagas tauka rajin kereja ba (mua) urang tang ngelusu kereja ba diri empu. Enti iya disebut ngena jaku ke negatif, urang ke baka tu dikumbai kitai hipokrit.

Bala maioh bala banyak,

Buah ubi laun dikali buruk di pun, buah empasa laun diempa lunggar taun. Pekara ke manah/penemu ke menuku enti disimpan sereta enda dipekunsika enggau orang bukai, iya nadai beguna agi.

Buah kelala ari langgu, Bansa kelala ari jako

Enti enda diatu, Kemaia?, Enti enda kitai, Sapa??

Aku ngari ka bala maioh, meri besai terima kasih ngagai endo' Jacqueline (Indai Empari) laban amat landik “nengkebang” ngaga andamfamilies.blogspot.com. Nyadi kitai udah bisi facebook, link andam families & ia ka terbari ialanya andamfamilies.blogspot.com. Kitai maioh ruang endur kitai kongsi penemu, konsgsi gambar, ngerat ka kaul serta nyadi ka rekod serta promosi ngagai orang luar. Minta kerja sama semua meri komen kena kitai ngemah ka agi blogspot serta gunameh enggau betul.

Nyadi kena aku ngujung ka jako, aku deka bebiau ka aki enggau kitai semoa minta pengerai serta gayu nguan menua. Aki selalu ngasuh aku bebiau serta enti bebiau sebut besai ko ia, nyadi baka malam tu aku nunai ka peminta ia. Enti salah anang nganu, tolong ajar ngambi penemu makin bertambah:-

BEBIAU MINTA PENGERAI, GAYU

O-ha! O-ha! O-ha!
Nama ke semetak inggar temekung?
Munyi ke masak chagak bedil kelutung.
Tebah Kemendan Tuan Menggung,
Didinga ari pun Semambu Ngandung
Kunjung-kunjung nyadi benung Tajau Bujang,
Kebung ka burung tiung lelaki.

Nama ke semetak inggar didinga?
Munyi ke masak chagak bedil temaga
Tebah bini Tuan Raja
Didinga ari Singapura
Pansa geruda kapal bekejang,
Ngadap ka leka matahari mati.

Nama ke semetak inggar bemunyi
Munyi ke masak chagak bedil besi,
Tebah bini tuan Ipan Stephen Beti,
Didinga ari tisi langit lati,
Lanji-lanji tengkak sawang.

Ari nya baru aku ngangau ka
Ribai ke datai ari tasik besai
Linang ledung,
Betumpu alau, berimbai ruai,
Enggau Menyalin Bungai,
Tutup Temaga Lawai Bunsu Garai,
Berumah di rantau panjai
Tinggang telesai bungai engkuang.

Ngangau ka Chendung Lempung Pelingan,
Puchung begantung nengan bulan,
Bunsu Bundan, orang tau nangga
Gam gigi gumbang.

Rumbai tu beranak ka Endu Pupu Kebul Bebuli
Tu indu pemadu nama,
Dikumbai Dayang Tekang Mau Tuchi
Rega nengeri siti menua
Beranakka Lulung datai ari
Segupung Ati Tanah
Sembah di kelasah pandan bekuang.

Beranakka Kumang
Nepan di takang apung beluyah
Menyadi Saripah Aka Tuan,
Jadi enggau Sigi Beru Hari
Ninggang kunchi guntur beringgang,
Jadi enggau Sigai Beru Lemai
Ninggang telesai ujan sayang.
Nya orang ngemeran ka batu pesuk
Teman tunjuk jari lima
Ai belambuk ngampuh ka menua.
Nya menua Apai Miga
Betanduk ngena, umba ketapu
Buok galung bauh ngelagetang.

Rumbur ka Sibau rambuk bulu
Menua ampa raya tekebu,
Sebuah tukau bangkung langkau
Menua Lemandau datai ari ngelepau
Gumbang besabung.
Menua pating aur pengerindu
Lendu-lendu maguh ka
Ulu Belimbun Jawa.
Takang buluh ayu ngachuh ka ulu
Putih Menyala.
Nya menua Raja Bangka bedinding ngena
Gumbang menyadi.
Tuan Jandan bedinding hari
Sukadana Bebuli Ati.

Nya betampung enggau menua
Raja Segangga Gunggung
Penyadung Antu Tuah
Berimbai enggau Raja Segangga Ganggai
Penatai Antu Limpah,
Nya jadi enggau Kemeli Kemantan Padi
D’ambi mimpi jadi raja.
Jadi enggau Kemelat Tampuk Lensat
D’ambi kenyap tinduk lina.

Dia sida mai pengaruh,
Batu lementak bai ngabang
Ngambika tau nyelepak awak
Menua orang.
Batu duri bai ngabang
Ulih nemu di tuki ridan pengerang
Batu pabung mai ngabang
Ulih nemu di lampung tekalung pundang.

Taring uting babi ngelampai
Tanduk rusa mulai,
Gemala panggum tupai
Dibai orang tuai mansang nandai
Selit di punggai puting ilang.

Awakka gayu, awakka guru!
Awakka gerai nyamai!
Raja nguan menua!

Kami minta jalai bidik enggau lansik,
Minta betuah minta belimpah,
Minta gerai minta nyamai
Minta chelap minta embap.

Aku ngangau ka Petara Aki, Petara Ini,
Ngangau ka orang ke lama udah lelang,
Lama udah midang,
Sida ke udah parai, ke udah nadai,
Nya dikangau, ditesau,
Nya aku kumbai, aku lambai.

Nyaup aku ngupas padung, ngupas tilung,
Ngupas panggang, ngupas ruang,
Ngupas penuduk, ngupas peninduk,
Ngupas ruai, ngupas tikai.
Ngambika iya bau rengu, bau garu,
Bau empenit, bau bangkit.
Ngambika endur betunggah, endur besembah.
Ngambika tampak Tuan, tampak Sultan,
Tampak China, Tampak Belanda,
Tampak Laut, Tampak Bunut.

Tu endur besauh, endur belabuh,
Endur betanya, endur bepinta.
Ngambika kami mansang, kami nyegang,
Kami ngebung baka langit
Entuchung baka bukit.

Ruai kami baka danau
Tampak meh kami baka pulau
Gayu guru gerai nyamai semua kitai ku simpandai.

Terima kasih

CONGRATULATION TO JACQUELINE

Andam Families meri tahniah ngagai Mr. Sulong Gabriel sebilik laban Endu Jacqueline (Bini Sulong) boleh kerja perintah serta deka belatih nyadi Cikgu di Perak enggau pengelama tiga bulan. Bala JKKK ngarap ka ruang bilik seduai tetap nyulut serta lantang dalam pengidup. Congratulation.

Niang Biti anak Penghulu Janting 3 taun udah ngejangka dunya.

Kena 25 Julai 2011, genap 3 taun niang Biti anak Penghulu Janting iyanya indu ti dikesayauka niang Andam anak Singgai udah ngejangka dunya injau tu ketegal ti sakit.

Dikena nandaka tu, sekeda raban Andam Families bisi ngulu sembiang di pendam Methodist Bukit Aup lemai hari Satu 25/7/2011 kira-kira jam 5.40 lemai. Sembiang ba pendam niang digulu Henry Mamut, Nancy Samban, Tony Henry, Nis Henry, Jenny Henry, James Wong, Jiki Layie, Ujang Lee, Lau Ensur, Anjeng Andam, Evie Izzati, Ceaser Andam, Magaret Anyi enggau indai iya Sawen La'ang.

Kelimpah ari nya, bala mega sembiang di pendam niang Impin anak Galang enggau Jawang anak Melap.

Ngasi bendar ga hari laban Petara meda penuju bala ti deka besembiang nya alai taja hari balat bendar bemua tang enda ga ujan dataika bala mulaika diri.

Taja enda mayuh bala datai, ukai ketegal enda sinu tang pengawa ti nekul ngasuh enda ulih ngemanjaika kaki diri datai ba pengawa nya. Tang setiap iku bala telesak iya sigi ngasaika pemuang ditinggal niang ti chukup lantang ati begulai enggau semua serak iya baik biak tauka tuai.

Sama meh kitai ngemanjaika sampi kitai, awakka semengat niang diibun petara di serega. Besampi mega ngagai semua telesak iya di dunya awakka terus diberekat petara baka petara ti udah beberekatka pengidup niang di dunya dataika sebilik iya ulih bediri sebaka enggau enggi orang.

Memarin Di Penebak, Ulu Layar, Betong

Langgur deka memarin udah nyadi nyata ngagai raban Andam Families. Sida udah mujur ngatur siti pengawa memarin ba menua endu a.k.a Mummy Hero di Penebak, Ulu Layar, Betong. Pengawa memarin tu diatur kena 9 Julai 2011 dataika 10 Julai 2011.

Bala besemaya meleka ari rumah diri kena pukul 9 pagi lalu beranti di Layar Rest Stop. Bala ari Kuching iyanya sida Apai Alvin sebilik, sida Apai Bana sebilik enggau sida Apai Jacquel Sebilik. Bala ari Sibu ti mupuk pagi iyanya sida Apai Betty sebilik, Apai Anna sebilik, Apai Darren sebilik enggau Apai Iton sebilik. Apai Hero temengkang laban stand by operasi Bersih 2.0. Nya alai sida iya laun mupuk. Sida Apai Jarus laun ketegal Jarus bisi test Boys Brigade. Apai Sengkuai laun ketegal agi gawa.

Bala mayuh begelumu di Layar merarau tengah hari nya. Pemayuh bala narit ati sekeda orang ti bisi ngetu dia. Nya alai bisi sekeda ari raban Andam Families ditanya orang ti alit ati meda pemayuh bala beranti dia.

Bala ngejang ari Layar Rest Stop kira-kira pukul 1.30 lemai lalu ngenataika diri di Penebak jam 2.30 lemai. Jalai ngagai Penebak endang balat amat nguji. Asaika mai kerita ngagai Genting ku bala besema. Terengkah di payung rumah Dunggat di Penebak, bala raban Andam Families disambut enggau penuh pengaga ulih igat Jeli. Iya kisuk bendar betusunka kerita ti nyau 13 buah nya.

Sebedau nuju ngagai kerangan nalan alai bemalam enggau memarin, bala dulu dialuka apai Jeli iyanya Mr.Merebai ak Nyalin sebilik. Chukup manah basa bala ditu. Udah nya, bala dilaluka ngagai bilik TR. Dunggat enggau madi iya. Siru amat bala sida ke temuai ti datai. Berasai temegah ati disambut sida bakatu.

Tembu dilaluka, bala raban Andam Families magi pengawa diri. Sekeda berangkut lalu nuju nalan memarin. Sekeda agi enggau sida apai Jeli enggau TR. Dunggat ngupa pantu. Bala ti ngupa pantu iyanya tuan chairmain Andam Families; Katis Noel Nyabong, Henry Mamut, Randi Ensur, Wuen Meringgai enggau Nis Henry Mamut. Enda lama aja ngambi 7 puchuk. Chukup landik sida ditu ngupa.

Sida ti ba nalan memarin nya mega chukup richah. Ulih didinga ari endur ti ngupa. Naka meh pengerindu ati bala anak mandi di ai Penebak.

Penatai bala ti ngupa, sida nurun ngambi babi. Dalam kiruh bebelaka babi, bala bisi tegepang mimit. Apai Iton ti kiruh begigaka kayu kena nunu pala babi udah bakal bekau kena duku ti tekelibak pegai iya ngujungka betis iya dua belah piak sama kena. Aki Alvin sempat ga mentin darah Apai Iton enggau penau iya. Apai Iton udahnya dibai bekelala enggau derisa ba Klinik Kesihatan Nanga Tiga. Bejait meh tudah tuai Apai Iton ngujungka iya enda dikemendarka mandi takut telih iya basah.

Malam nya bala chukup richah. Iya ke mandi terus mandi dataika pukul 2 pagi. Sida ti nyelam dataika pukul 4 pagi. Malam nya mega bala kami bepakaika lauk dipanduk pansuh semua. Babi pansuh, ikan pansuh, upa pantu pansuh, changkuk manis pan pansuh enda tinggal mega pulut. Tebuka magang pengingin ati makai bala mensia.

Bala ari rumah panjai mega ngulu bala raban Andam Families di kerangan dataika pukul 3 pagi. Mayuh utai ditiu, mayuh jerita jenaka dikena merindang malam. Bala ti mit nadai memunyi nyangka rindu amat bemalam di tanah. Hesron ti pengabis biak baru beumur 5 bulan pan nadai merengu. Bala ti tuai, chapuh bebagika coklat arak bai Janting Ensur ari Belgium. Bala anak mit pan bisi mega diambitka aya sida coklat. Penenguk makai jagung tunu mega tepantup. Seguni lebih jagung dibai sida Apai Alvin ari Kuching.

Hari siti, tumu pagi udah richah bala anembiak. Sida Bella udah belabuh mandi jam 5 pagi. Amat pama bala anak. Sepagi-paginya sida mandi enggau chukup bendar. Bala ke tuai kiruh nyelam, mukat enggau berambat. Bisi mega ikan ungkup sida. Dua ruas lebih ikan ulih sida. Tang sida nadai bulih lebuh nyuluh malam.

Kira pukul 11.30 pagi, raban Andam Families besikap muka langkau, masu kanvas sereta besimpanka barang. Udahnya sida mupuk mulaika diri. Tak agi belala bala bemalam.

Sebedau pulai sida meri basa ngagai TR. Dunggat. Ba peluangnya raban Andam Families ngenataika plak enggau tanda pengingat ngagai TR. Dunggat tanda abi kaki Andam Families di Penebak, Ulu Layar, Betong. Plak enggau tanda pengingat nya dikenataika tuan chairmain Andam Families iyanya Mr. Katis Noel Nyabong. Tanda pengingat ti diberi iyanya peti penusah bebadi ngenyit.

Tembu nya, sida begambar bebala mayuh enggau bala ba Rh. Dunggat. Penudi bendar, bala sekali agi begempuru di rumah apai Jeli sebedau ngejangka Penebak enggau penuh pengaga, pengerindu sereta agi belala.

Ai ti chiru, basa ti siru ngasuh ati bala tekait. Dataika sida ngelar kerangan alai sida bemalam kerangan Andam.

Sebedau mulaika diri ngagai nalan endur gawa, bala sekali agi beserumpu di Layar Rest Stop. Sekali agi raban Andam Families narit ati bala bukai ti ngetu dia. Sekali tu semua raban Andam Families ngena kelambi Andam Families. Temegah bendar ati meda penyerakup raban Andam Families ti ulih dipandangka ngagai orang.

Terima kasih Tr. Dunggat enggau sida serumah. Terima kasih Penebak. Ila kami datai baru.

Next trip.... bala merambu deka ngagai Bakun, Belaga enggau Sungai Kunang Sarikei. Watch Out!!!! Andam Families rocks!!! Terus beserakup!

Beserakup, Nengkebang, Nyulut

Tayangan Perdana Andam Families

Hari minggu - 24 Julai 2011, bala Andam Families ti diau di menua Sibu udah begelumu ba Jalan Cherry deka meda Road Tour Andam Families from Pre Gawai to Memarin di Penebak. Bala beserumpu makai tengah hari sama bebaika lauk enggau asi. Chukup kenyang bala laban mayuh amat lauk. Manuk panduk campur kasam ensabi, manuk tunu ala pansuh, budu ikan empirang, sambal belachan enggau ulam entimun, daun empasa, retak serugan, retak aki tuli, daun selom enggau mawang muda. Kelimpah nya empasa kusuk, daun ensabi goreng, ikan kembung pedas, mee goreng enggau sup sayuk jagung mega.

Naka pengerami bala maya nya. Penatai bala lebih tiga puluh iku. Pengawa meda tayangan perdana tu belabuh kira-kira pukul 1.30 lemai dataika malam. Rindang amat bala meda ulah mayanya. Tang pekara ti chukup narit ati iyanya maya meda bala sida penyanyi import ari Hong Kong iyanya Terrance Jamba, Tony Henry, Sulong Gabriel enggau Katis Noel Nyabong ngemai lagu Hatiku Kekal Padamu versi cina campur melayu. Hahahahaha.

Bala merambu deka meda Jalan Kenangan Silam iyanya pengerami melah pinang apai Darrence enggau indai Darrence di Kemuyang ila.

Kelimpah ari nya, bala mega deka ngaga majlis berbuka puasa ba rumah sida Indai Wan enggau Apa Mbo nyerumba bulan puasa tu ila.

Wah... steady Andam Families.... Semua deka dirami magang. Terus beserakup.

Andam Families dikelala di Belgium... World you!!!

Penemuai ke Penebak, Layar, Betong ngemai siti agi berita manah. Ngagai bala ti enda ulih nyereta ke Penebak, aku deka bekunsi enggau kita semua... http://andamfamilies.blogspot.com udah kala dipeda bala orang di Belgium lebuh raban Andam Families iyanya Janting Ensur enggau ngulu pemelatih di Belgium ari Bulan 4 dataika bulan 6 taun 2011 tu kemari.

Wat Janting bisi bepesindangka kelambi Andam Families lebuh ti neresa menua ribai. Nya alai ketegal ti alit ati meda address blogspot kitai, dia sida deka nemu enggau silik agi pasal pekara nya. Enggau temegah ati wat Janting udah neresa mimit pasal Andam Families. (Kembai asai tungkul atau ninga jerita wat tu.) Sida di Belgium temegah ati meda pengawa ti udah digaga kitai sebilik dalam nyerakupka kaul kitai sebilik ti mayuh atas nama Andam Families laban kenu ku sida kitai tu udah ngaga pengawa ti mar digaga. Indah sida ti jauh udah maju enda mujur ngempung diri sebilik baka ti udah digaga kitai tu. Baru sida nemu kitai.

Sebedau mulaika diri ke menua, dia bala raban alai belatih di Brussel, Belgium udah ngabas blogspot kitai. Temegah amat asai ati aku ninga rita madi aku tu. Rindu mega sida meda blogspot kitai. Nya iya bulih!!!.

Amat meh rambai jaku ti dipegai Andam Families iyanya "Beserakup, Nengkebang, Nyulut". Ketegal kitai ti beserakup dia kitai ulih nengkebang mayuh pekara lalu meri kitai nyulut di mua orang mayuh. Idup Andam Families. Enti niang agi begulai enggau kitai tak enda nemu meh pengaga ati iya ninga rita purih pantih udah nyau dikelala orang ba menua ribai. Indah gambar iya pan udah dipeda di menua ribai.

Taja iya nadai, tang Apai di serega tentu bejerita pasal berita ti ngasuh ati iya gaga ba dunya apai din. Besampi awakka semua kitai terus begempung sereta besampi mega awakka sida ti udah ngejangka menua terus lantang senang ba dunya baru din. Amen.

Pre Gawai 2011 & 1st Anniversary of Andam Families

Enggau pengaga ati serta tabi basa, aku meri Selamat Ari Gawai Dayak ngagai bala Andam Familes..Ngajih ka taun tuk kitai bulih tuah, bulih limpah, bulih reta, bulih tengkira, bulih setawak, bulih menganak, ngambi ka kitai jelai rita, manah nama, Nuchong baka bukit Rabong menoa, Tinggi baka langit nungkat neraja, Terang baka pandang bulan purnama, bertuan ka juluk kitai BESERAKUP NENGKEBANG, NYULUT.  Gambar maya kitai ngintu Pre Gawai & 1st Anniversary of Andam Families udah bc ba Gallery kitai...Terima kasih. 

with Luv,
Mummy Hero

Happy Good Friday

Kena 22.04.2011..Kitai nyambut ari EASTER,ka terubah ia aku merik selamat ari Easter asuh Andam Families.......Kena maya nya ila sama-sama meh kitai bela asuh pendam Aki enggau inik,sembayang kubur dini semua kitai....arap ka semua Andam Families sama bela sampal datai.....Jam maya kitai bertemu ba pedam maya nya ila kira-kira pukul 0730am....takut ka jalai sekut.........sekali agi aku merik selamat nyambut ari EASTER asuh ANDAM FAMILIES.....God Be With U All....Amen...

Thanks Giving Prayer & Welcoming Benedictius Hesron Ak Baling