Miring

Pengawa Gawai (Miring)

Miring nya sebengkah pengawa ti suah dipeda maya gawai. Mayuh kitai saru nama tuju miring, enda nemu nama perengka dikena miring sereta tusun miring. Ukai ga nemu bendar tang bekunsi sekeda penemu ari ti beratika pengawa miring ti bisi dikereja kami di ai Batang Rajang.

Nitihka sida aki (Andam ak. Singai), pengawa miring tu mayuh tuju baka kena ngelaluka pengabang ti datai (nunjukka basa), kena meri terima kasih ketegal pemayuh utai ulih ba taun ti udah, kena minta pemujur ba taun ti deka datai ba nama-nama pengawa ti deka digaga.

Kereban dikena miring iyanya telu, rendai, tumpi, asi pulut, tuak enggau telaga iya, sirih, kapu, asi amat, garam, lauk (pusu, salai tauka utai bukai), semakau, ruku (selalu iya ruku apung), sedi, ketupat enggau sungki. Nyadi pemayuh utai ti dikena kelimpah ari garam, asi amat, kapu, tuak enggau rendai iyanya mesti dalam kira ti patut nitihka ungkup piring nya. Enti piring nya piring lapan, semua utai di atasnya mesti lapan igi tauka lapan iti.

Atur miring nya dilabuhka baka kitai nerima temuai ku sida aki. Temuai datai disurungka kitai ruku, sirih, sedi, kapu, pinang enggau semakau (nandaka sida nginsap tauka makai sirih dulu). Udahnya baru ditangkanka kereban pemakai baka asi, lauk, garam. Nangkanka nya, baru miring. Tu baru ngengkahka asi pulut, tumpi, ketupat, sungki lalu ditangkanka enggau rendai sereta telu. Penudi bendar diengkahka telaga tuak sebedau diiri enggau ai tuak. Udahnya, piring tu tadi deka dibiau enggau selanjau manuk ijau. Ngena leka sampi ti chukup mayuh reti, minta pengeraja, minta berita, minta pemidik, minta pengelansik. Nutup pengawa miring tu iyanya diujakka bulu manuk di udah dichal enggau darah manuk.

Udah semuanya tembu, piring deka diengkah ba teresang.