Gambar udah tembu niti daun di Sebuloh.
Niti Daun
Pengawa niti daun tu siti ari pengawa ti jarang digaga maya gawai. Mayuh nembiak kemaya hari tu enda kala meda utai tu. Iya ti ditemu sida maya gawai bisi karaoke, poco-poco enggau betanda tauka mabuk. Enda ulih nyalah sida laban nya utai ti teleba dipeda sida. Indah ba menua sebengkah-sebengkah nadai pengawa ngelaluka pengabang digaga.
Niti daun semina diatur enti bisi pengawa ti besai diintu ba sebengkah-sebengkah rumah panjai. Ba pengawa niti daun tu, sida indu enggau lelaki ngena ngepan Iban ti chukup manding dipeda.Nya ngasuh sida chukup bajik sereta sigat amat. Sida lelaki nampak sikar lalu sida indu nampak bebendang.
Nyadi pengawa niti daun tu disereta sida ti ngajat, betabuh, lelaki enggau indu sereta dikemudika siku ti ngemai tambai sereta manuk siku ditanchang sama. Sida ti niti daun deka besundang tiga kali niti rumah. Belabuh ari ruai deka mansutka diri ke tanju. Sida indu bisi megai pirin diisi enggau rendai. Rendai nya deka ditabur ba ruai enggau tanju ti dititi bala sida iya.
Bala orang ti enda enggau niti daun deka bediri ba ruai diri empu nyiburka ai tuak ngagai sida ti enggau niti daun. Taja bakanya enda ga sida ti niti daun mesti ngirup ai tuak nya. Tang mayuh sida ti bungau ketegal tuak ti disadung maya ti niti daun.
Ngagai bala ti enda kala meda gaya orang niti daun, diengkah ditu sekeda gambar niti daun.
No comments:
Post a Comment